Hamðismál

Джерело: Sophus Bugge. Sæmundar Edda, 1867.

 

¹ Sprvtto a tái
tregnar iðir
gręti alfa
in glýst{ǫ}mo;
ár vm morgin
manna b{ǫ}lva
svtir hveriar
sorg vm qveyqva.

 

² Vara þat nv
ne i gęr,
þat hefir langt
liþit siþan:
er hvatti Gvðrvn
Givca borin
sono sina vnga
at hefna Svanhildar:

 

³ «Syster var yccor
Svanhildr vm heitin,
sv er Iormvnreccr
ióm vm traddi,
hvitom oc svortom
a hervegi,
grám, gangt{ǫ}mom
Gotna hrossom.

 

⁴ Eptir er ycr þrvngit
þioðkonvnga,
lifiþ einir er
þátta ęttar minnar.

 

⁵ Einstǫð em ec orðin,
sem {ǫ}sp i holti,
fallin at frǫndom,
sem fvra at qvisti,
vadin at vilia,
sem uíþir at l{au}fi,
þa er in qvistscęþa
kǫmr vm dag varman.»

 

⁶ Hitt qvaþ þa Hamþir
inn hvgomstóri:
«Litt myndir þv þa, Gvdrvn!
leyfa daþ H{ǫ}gna,
er þeir Sigvrð vocþo
svefni or,
saztv a beþ,
enn banar hlógo.

 

⁷ Becr váro þinar
inar bláhvíto
roþnar valvndom,
flvto i vers dreyra;
svalt þa Sigvrþr,
saztv yfir d{au}þom,
glyia þv ne gaðir,
Gvnnarr þer sva vildi.

 

⁸ Atla þottiz þv striþa
at Erps morði
oc at Eitils aldrlagi,
þat var þer enn verra;
sva scyldi hverr {ǫ}þrom
veria til aldrlaga
sverþi sarbeito,
at ser ne striddit.»

 

⁹ Hitt qvaþ þa S{ǫ}rli,
svinna hafði hann hyggio:
«Vilcat ec við moþvr
malom scipta,
orz þiccir enn vant
ycro hváro,
hvers biþr þv nv, Gvðrvn!
ęr þv at grati ne fǫrat?

 

¹⁰ Brǫþr grat þv þína
oc bvri svasa,
niþia naborna
leidda nęr rógi;
ocr scaltv oc, Gvðrvn!
grata baþa,
er her sitiom feigir a m{ǫ}rom,
fiarri mvnom deyia.»

 

¹¹ Gengo or garði
gorvir at eiscra,
liþo þa yfir vngir
vrig fioll
m{ǫ}rom hvnlenzcom
morþz at hefna.

 

¹² Fvndo á stręti
stórbr{ǫ}gðottan:
«Hve mvn iarpscamr
ocr fvltingia?»

 

¹³ Svaraþi inn svndrmǫþri,
sva qvaz veita mvndo
fvlting frǫndom,
sem fótr {ǫ}þrom.
«Hvat megi fotr
fǫti veita
ne holdgróin
hond annarri?»

 

¹⁴ Þa qvaþ þat Erpr
eino sinni,
męrr vm léc
a mars baci:
«Ilt er bl{au}þom hal
br{au}tir kenna.»
Koþo harþan mioc
hornvng vera.

 

¹⁵ Drógo þeir or scipi
sciþiiarn,
mękiss eggiar
at mvn flagði;
þverþo þeir þrott sinn
at þriþivngi,
leto m{ǫ}g vngan
til moldar hniga.

 

¹⁶ Scoko loþa,
scalmir festo,
oc godbornir smvgo
i gvdvefi.

 

¹⁷ Fram lago br{au}tir,
fvndo vastigo
oc systvrson
saran a meiþi,
vargtre vindc{ǫ}ld
vęstan bǫiar,
trýtti ę tr{ǫ}no hvot,
titt varat biða.

 

¹⁸ Gl{a}mr var i h{ǫ}llo,
halir {ǫ}lreifir,
oc til gota ecci
gerþot heýra,
aþr halr hvgfvllr
i horn vm þ{au}t.

 

¹⁹ Segia foro [iarlar]
Iormvnrecci,
at senir váro
seggir vnd hialmom:
«Ręþit er vm ráþ!
rikir ero comnir,
fyr matkom hafiþ er m{ǫ}nnom
mey vm tradda.»

 

²⁰ Hló þa Iormvnreccr,
hendi drap a kampa,
beiddizat br{ǫ}ngo,
b{ǫ}ðvaþiz at vini;
scoc hann sc{ǫ}r iarpa,
sa a sciold hvitan,
let hann ser i hendi
hvarfa ker gvllit.

 

²¹ «Sęll ec þa þottvmc,
ef ec sia knetta
Hamþi oc S{ǫ}rla
i h{ǫ}llo minni,
byri mvnda ec þa binda
meþ boga strengiom,
goð born Givca
festa a galga.»

 

²² Hitt qvaþ þa Hroþrgl{ǫ}þ,
stoþ vf hleþom,
mefingr męlti
við m{ǫ}g þenna:
«† Þviat þat hetta
at hlyþigi myni,
mega tveir menn einir
tív hvndroþ Gotna
binda eþa beria
i borg inni ha.»

 

²³ Styrr varþ i ranni,
stvcco {ǫ}lscalir,
i bloþi bragnar lago,
comiþ or briosti Gotna.

 

²⁴ Hitt qvaþ þa Hamþir
inn hvgomstori:
«Ęstir, Iormvnrecr!
occarrar qvamo
brǫþra sammǫðra
innan borgar þinnar;
fętr ser þina,
hondom ser þv þínom,
Iormvnrecr! orpit
i eld heitan.»

 

²⁵ Þa hr{au}t viþ
inn reginkvnngi
baldr i hrynio,
sem biorn hryti:
«Grytiþ ér a gvmna,
allz geirar ne bita,
eggiar ne iarn
Ionacrs sono.»

 

²⁶ Hitt qvaþ þa Hamþir
inn hvgomstori:
«B{ǫ}l vantv, broþir!
er þv þann belg leystir,
opt or þeim belg
b{ǫ}ll raþ coma.»

 

S{ǫ}rli qvað:

 

²⁷ «Hvg hefþir þv, Hamþir!
ef þv hefdir hyggiandi;
micils er a mann hvern vant,
er manviz er.»

 

Hamþir qvað:

 

²⁸ «Af vęri nv h{ǫ}fvþ,
ef Erpr lifði,
broþir occarr inn b{ǫ}ðfrǫcni
er viþ a br{au}t vagom,
varr inn vigfrǫcni,
hvottvmc at dísir,
gvmi inn gvnnhęlgi,
gorþvmz at vigi.»

 

S{ǫ}rli qvað:

 

²⁹ «Ecci hygg ec ocr vera
vlfa dǫmi,
at vit mynim sialfir vm sacaz,
sem grey norna,
þ{á} er graþvg ero
i {au}þn vm alin.

 

³⁰ Vel hofom viþ vegit,
stondom a val Gotna,
ofan eggmoþom,
sem ernir a qvisti;
goþs hofom tírar fengið,
þott scylim nu eþa i gęr dæyia;
queld lifir maðr ecki
eptir qvið norna.»

 

³¹ Þar fell S{ǫ}rli
at salar gafli,
enn Hamþir hne
at hvsbaki.

 

Þetta ero c{ǫ}lloþ Hamþissmál in forno.